مہمندایجنسی میں چوتھا سپورٹس یوتھ اینڈ کلچر ل فیسٹیول 2018کے مقابلے 10فروری سے شروع ہونگے۔

مہمندایجنسی( عزیر خان مہمندسے) مہمندایجنسی میں چوتھا سپورٹس یوتھ اینڈ کلچر ل فیسٹیول 2018کے مقابلے 10فروری سے شروع ہونگے۔ اس سلسلے میںجمعرات کے روز ہیڈکوارٹر غلنئی جرگہ ہال میں پولیٹیکل ایجنٹ مہمند محمود اسلم وزیر نے (لوگو )کی تقریب رونمائی کرکے فیسٹیول کا باقاعدہ افتتاح کیا،جس میں ایڈیشنل پی اے حامدالرحمن، ایجنسی سپورٹس منیجر سعید اختر، تینوں سب ڈویژن کے اے پی ایز طارق اللہ، توصیف خالد،شیر عالم ، قومی مشران ، سیاسی و فلاحی تنظیموں کے کارکنوں ،سکولوں ، کالجزکے طلباء اور علاقے کے کھلاڑیوں نے بھی کثیر تعداد میں شرکت کی ۔ اس فیسٹیول میں سپورٹس ، کلچرل ،ٹیلنٹ ہنٹ اور یوتھ افئیرز کی سرگرمیاں شامل ہیں جس کا باقاعدہ آغاز سکولوں ، کالجوں اور مدارس کی ایونٹس سے کیاجائے گاجسں میں حسن قرات، ملی نغمے ، تقاریر، نعت اور پینٹنگ کے مقابلے ہوں گے ۔ جبکہ اس کے علاوہ دیگر سپورٹس ایونٹس میں فٹبال، کرکٹ، والی بال، بیڈمنٹن ، اتھلیٹکس، کبڈی ، رسہ کشی، سائیکل ریس، میراتھن ریس، ثقافتی سرگرمیوں میں علاقائی شعراء کا مشاعرہ، لوک میوزک ، ثقافتی، پی ٹی شو، جمناسٹک اوربہت سے تفریحی پروگرام پیش ہونگے۔ اس موقع پر منعقدہ تقریب سے خطاب کرتے ہوئے مہمان خصوصی پولیٹیکل ایجنٹ محمود اسلم وزیر نے کہا کہ مہمندایجنسی ایک پرامن علاقہ ہے اور یہاں کے عوام امن پسند ہیں جس کابنیادی مقصد دنیا کو یہ پیغام دیناہے کہ اس قبائلی خطے کی عوام امن سے محبت کرتے ہیں اور اپنے علاقوں میں کسی بھی قسم کی بدامنی نہیں چاہتے وہ امن، ترقی اور خوشحالی چاہتی ہے ۔ انہوں نے کہا کہ ان کھیلوں میں حصہ لینے والوں کھلاڑیوں کو اپنی صلاحیتیوں کی بھرپور مواقع ملیں گے اوران کے ذریعے ان کو آگے ملکی سطح پر بھی نمائندگی کی مواقع مل سکتے ہیں۔ انہوں نے کہا کہ ان کھیلوں میں نمایاں کارکردگی دکھانے والے کھلاڑیوں میں ٹرافیاں، نقد انعامات بھی تقسیم کیاجائے گا۔آخر میں ایجنسی سپورٹس منیجر سعید اختر نے میڈیا کو بتایا کہ ایجنسی میں فیسٹیول کے مقابلے دس فروری سے شروع ہوکر 23مارچ تک جاری رہینگے۔